Bitartean ibillico dira becatutic becatura amilduaz; oraiñ pensamentu batean, gueroseago itz loyak gozotoro aditzean: oraiñ escuca, edo queñada batean, guero musu edo laztanetan: oraiñ ipui ciquiñac contatzen, guero dantzan, edo dantza ondoan
alberdanian.
J.B. Agirre
Zeri begira zaude
euriaren errezela
eskuaz zabaldu nahirik?
Euria ari du
beti lez,
betiko euria
joandako denborari
errezela ipintzen
beti lez.
Bortxaz hildakoen
begiek ez dute
begi-ninirik,
bi bala-zulo baizik.
Begi-niniak
euri-tanta dira,
teilatua zulatzen
duen euritean.
Bortxaz hildakoen
begiek ez dute
begi-ninirik,
bi euri-zulo baizik.
Eta ni, hatz erakusleak
begi-ninietan sarturik.
Balak beti aurrera egiten du, gorputza zeharkatuta, pareta zuri baten bila.
Eta norbait, makurturik.
Balak pareta zurian egindako zuloak kontrako aldera begiratzen du beti.
Eta norbait ahuspez, lurrari muinka, edo arnasa bila.
Bertsorik mistikoenak
egingo nituzke gaur.
Lurrak, baina, eten dit ahotsa,
Lurrak nakar bere erraietara;
Lur beltzak bere baitara nakar.
Eta ni, hizkiz hizki,
bertsoari hilobiak zulatzen.
Oi, lur; oi, lur,
oi, ene lur errea!
Azazkalez zulaturiko hilobiek,
arima lurperatzen didate.
Goiz emeak goiz emagaldu dira;
oi, ene lur errea!
Elur beltzez oro jantzia;
gizerreak zut, zoroan zut,
eta ni, oi lur, zure bazter…
Gaur bertsorik mistikoenak
egingo nituzke.
Maite zaituztet, hala ere maite zaituztet,
diotset ahots-hari batez,
zerua izartsu dago; har ezazue bana.
Txori bat hegaldatu da
gauak zuritutako urkiditik
egunsentiren baten bila.
Luzea da balaren bidea,
laburra txoriaren hegaldia.
Luma bat han, luma bat hemen,
lumak, lumak, lumak.
Zerua lumatsu dago; har ezazue bana.
Bihotzean min dut, min etsia,
negarrik ez darion mina;
itxaropen bat banuen: su-eten
—hatz artetik irrist— ihes egina.
Bihotzean min dut, min etsia,
negarrik ez darion mina;
etsiak ere ez du lekurik,
heriok darama sor adina.
Oteizaren hutsunea lasterrago hustu nahi izan dute, bonbaz.
Hutsune bat daramat bihotzean,
horixka eta zaharkitua,
hosto ihartua bezain ezdeusa,
hosto ihartua bezalakoa, zaharra.
Hutsune bat daramat bihotzean,
orbel-zulo bihurtua.
Oteizaren hutsunea, betzulo begi-galdua.
Iheslaria, etxerakoan, beti haraxeago
eramaten du haizeak.
Bideko nekeak atseden ditu
etxetik ihesi larri doanak;
nahiz aita-amek atzetik deitu,
ezin entzun haizeak daroanak.
Urrun, txit urrun, da pentsatzen ari,
iraganik hogei urte inguru:
ekin nahi lioke itzulerari,
inor ba ote etxean aiduru?
Lore bat zaio jaio begietan,
harribitxi lez itsas hegietan…;
itzulita ere, etxerik ez du:
beste kaleak, beste aurpegiak,
gurasoen argazki beilegiak…;
ihesak itzulezina berez du.
Danteren infernuko bidea
ipurdiz gora: zeru-bidea.
Kono bat, bederatzi zirkulu
zein baino zein estuago,
eta erpinean sumendia.
Gainetik begira, begi bat.
Eta negarra, konikoa.
Mirande oro, igelmin.
Igel batek jauzi egin du
aintzira ertzean:
zipriztinak bihotzean.
Apskatasuna zalu limurtzen da
apo lingirdatsuaren ahoan,
dardarka haren izena urtzen da
zoramen berdearen arragoan.
Apoa non, apskatasuna hantxe,
igel-igeltto, igel-igeldari;
apoak besarkatu du oraintxe
sabel-sabeltto, sabel-sabeldari.
Irrist egiten du, baina, igeltto
zoro ezinegon herrestariak;
huts egin du apo ehiztariak.
Aintziraren bazterrean, krudeltto,
ahobete apo geldituko da;
aintzira biraoz erdituko da.
Igel batek jauzi egin du
aintzira ertzean: